# قصيدة - أنا - إنت /// بقلم /// الطيب . عوض. أحمد
- # قصيدة - أنا - إنت
- احترت أنا مين أنا
- وسط الزحام
- شايف كلام
- مبقتش عارف
- يوم أنام
- قبل ما اسألني سؤال
- مين أنا؟ ؟؟؟؟؟؟؟؟
- أنا الفاهم وأنا المحتار
- أنا العاشق لست الحسن
- وأنا ال بكر ها بمرار
- أنا الخايف أنا المرعوب
- أنا الراضى أنا المغلوب
- أنا المكتوب
- أنا الحريه والأحرار
- --------------------------
- أنا الخوف لأنى جبان
- أنا الجلاد وأنا السجان
- أنا المسجون فى زنزانتى
- وأنا الطغيان
- أنا الكلمه ال بتحنن
- وأنا الضحكه ال بتجنن
- وأنا الدمعه ال لو طلعت
- تعيش أزمان
- ---------------------------
- أنا الحاضر أنا الماضى
- أنا المذنب أنا القاضى
- أنا الكدبه ومعالمها
- أنا حقيقة كل شيئ هان
- مليش عنوان
- وعنوانى ف احضانك
- وسجانى هو سجانك
- باشعارى أقول الآه
- تردى بمر الحانك
- -----------------------
- أنا الكلمه إل صابها سكوت
- أنا الروح إل خدها الموت
- أنا الفرحه ال بتستنى
- ينام الخوف
- لجل ما تخرج من غير صوت
- -----------------------------
- أنا إنت بكل مافيكى
- أنا شمسك أنا قمرك
- أنا أرضك وحواريكى
- أنا ظلمك أنا عدلك
- أنا حاكمك أنا شعبك
- أنا حارس تراب أرضك
- وأنا ال سارق كل شيئ فيكى
- أنا إنت يا بلدى
- ونفسى تقولى يا ولدى
- وتخدينى فى احضانك
- تلاقينى ولاقيكى
- أنا - إنت
- #
- 18/4/2016'
ليست هناك تعليقات:
إرسال تعليق