((حواديت)) بقلم الشاعر // بقلم طارق السيد
- ((حواديت))
- قالوا زمان
- قول قالوا إيه
- قالوا كلام
- ودا يطلع إيه
- إللي ماشاف بعنيه اللحمة
- شاف الليّة ياعيني إتجنن
- مد ف إيده وقال بالرحمة
- ردوا عليه وقالوله يحنن
- قالوا زمان
- قول قالوا إيه
- قالوا كلام
- ودا يطلع إيه
- إللي بيجي على الغلبان
- عمره ف يوم مايكون كسبان
- وإللي يخاف من شكل الحبل
- بيكون لدغه أكيد تعبان
- ربك يدي قليل الحيلة
- رزق مايتكيل بالكيلة
- والحدق إللي عاملي مفتح
- بتجيله خيبة بستين نيلة
- قالوا السبع بدون أنياب
- تلعب بيه النسانيس الكورة
- وإللي بيهرب م الميدان
- عمره في يوم مايبان في الصورة
- قالوا زمان
- قول قالوا إيه
- قالوا كلام
- ودا يطلع إيه
- قالوا الراجل مش بشنابه
- وإلا الفار يصبح سي جنابه
- وإللي ماواخد باله يفتّح
- ياما الحاوي شايل في جرابه
- إللي بيخرج يوم من داره
- يستاهل قلة مقداره
- وإللي يخطي الخطوة يحاسب
- قبل مايبدأ بيها مشواره
- قالوا زمان
- قول قالوا إيه
- قالوا كلام
- ودا يطلع إيه
- قالوا إللي يشخلل بيعدي
- وإللي ماشخلل تنو مكانه
- وإللي هرب مركب وتودي
- يغور مايقولنا فين عنوانه
- والبلد إللي ماعارفك فيها
- أيها حد إتشقلب فيها
- لكن حاسب شقلباظاتك
- تجيب ياخرونج عاليها واطيها
- بقلم طارق السيد
ليست هناك تعليقات:
إرسال تعليق