صراع...!! بقلم الشاعر .....!! فوزي السيد
- صراع...!!
- ~~~~~~
- علشان الروح مُشتاقه تعيش
- وتشوف الكون من شعرة ضوء
- والقلب ف حُبه ما بيخبّيش
- دقاته تزيد وحابسني ف طوق
- خبّيت الجرح وعشت ف جوع
- حاسس بأمان وساعات مخدوع
- طاوي الأحزان بين الجنبين
- ماشي لقدام.... حاسس برجوع
- الروح بتداوي ف قلب جريح
- بيشب لفوق رغم التباريح
- يمكن يتلاقي مع الأفراح
- وورود عصيانه عن التفتيح
- وأنا كُل ما أقول ح أطلع قدّام
- الرعشه تاخدني ف وسط زحام
- عصيان يازماني مفيش ضحكات
- والحيره التايهه ف قلب زحام
- مرعوش مغشوش منقوش علي حيط
- والحب خلاص برّه التخطيط
- البير العايش جوّه الروح
- ضلمه ومكسور ...وجبان وغويط
- وباحاول أشد الفرح وأعوم
- والنبض ف عرقي نشاز مكتوم
- باتمدد جوه الحلم صريع
- يازماني إسندني وسيبني أقوم
- ملوف بسُكات ما لهوش تفسير
- تتهد الروح وتغيب تعابير
- ولإمتي ح أعيش بره المسافات
- محبوس وأنا باحلم بالتغيير
- العُمر خلاص قرّب يندار
- والشوق عطشان لغناوي نهار
- ح يقوم الفجر يجيب أحلام
- ويقوّم وهج والنور والنار
- علشان الروح مُشتاقه تعيش
- وتشوف الكون من شعرة ضوء
- والحزن يغيب وخلاص ما يجيش
- والقلب يكّسر وهم الطوق
- ~~~~~~~~~~~~~~~فوزي السيد
ليست هناك تعليقات:
إرسال تعليق