فضفضة @@ بقلم الشاعر @@ طارق السيد
- فضفضة
- زهقنا كلام وحوار إعلام
- وضباب وعذاب وخلاف أحزاب
- شوفولكم حل دي صبحت خل
- كفاية حرام أنا وسطي إنحل
- قولتوا جملنا هيطلع نخله
- لقينا جملكوا وقع فى الوحلة
- قولتوا عسلنا تملي بيحلى
- لاقينا عسلكوا بلسع النحلة
- عطشان ياخوانا وشغلتي سقا
- خنقني الدين وإيجار الشقة
- فاتورة النور وفاتورة الغاز
- قسط التلاجة مع البوتجاز
- ودرس خصوصي لبنتي هناء
- وكتاب جبر لأخوها علاء
- ودا غير نبر الست رجاء
- مرات الأسطى علي الحلاق
- نفر الجمعية فى واحد منه
- تيجي على بابنا وتسأل عنه
- أول شهري دا هم كبير
- أأقبض راتبي أدييه للغير
- أنياب الفقر أهي غرزت فيا
- ومصت دمي شوية شوية
- وإيد الظلم تقيلة عليا
- يااما أبوسها ياتضرب فيا
- لأ مش هبوسها
- أنا دمي عايصها
- ولسه الضربة
- فى ضهري حاسسها
- صوابعها معافرة
- عروقها ونافرة
- مش طايق أشوف
- ضحكتها الصفرا
- معلش ياناس تقلت عليكوا
- فضفضت شوية سلامة عليكوا
- بقلم طارق السيد
ليست هناك تعليقات:
إرسال تعليق