بيتنا القديم @@ بقلم الشاعر @@ طارق السيد حسين فاروق

• بيتنا القديم
• يبدأ كلامي بسلامى من بيت قديم
• شاخت حيطانه وإتنخرت عضامه
• على مر السنين
• والبيت كان إسمه على إسم صاحبه
• وكان إسم بيتا بيت قابيل
• مولود فى عطفة جوه حارة
• من جوه شارع فى حي الحسين
• فى مدخل بيتنا على اليمين
• أوضة محمد امين
• راجل فى حاله ساكت حزين
• دايما مفلس حانيه الدين
• يدعي لربه وربه كريم
• هو العزيز الحكيم العليم
• يمكن ربك بلاه عشان يكتر دعاه
• ويكون له فى الآخرة طوق النجاة
• وتطلع خمس سلالم
• طالعه بروزها مالهاش معالم
• تلاقي حوش تهابه الوحوش
• تملى ضلمة وساكنه اللى ساكنه
• وتنزل سلاملك تلقى هناك
• اوضة قديمة وليها شباك
• ساكنه فيها ست كفيفة
• من يومها طاهرة وعفيفة
• مالهاش فى دنيتها
• غير فرشتها واوضتها
• كل يوم نسأل عليها ونقضي حاجتها
• دى دعوة منها تعدل حياتنا
• وجارتها الست صفية
• مشاركاها فى عفشة المية
• غداهم طبخة واحدة تمنها جنيه
• كفايه جنيه ده مبلغ عال وفل الفل
• حلة عدس تقضى الكل
• فى الدور الأول
• عم شديد فتوة بقوة وصحة حديد
• يصحى بدري جدا قبل الديك مايدن
• يحفلط فى نفسه ويصحي مراته عندا
• يقولها فزي قومي.. حضريلي هدومي ..
• تلاقي مراته نعمت.. قايمه لاويه بوزها
• مبتنطقش كلمه ..عشان إكمنه جوزها
• وجارتهم ست يشرى
• فاكرينها بحسن العشرة
• بنت بلد تفوت فى الحديد
• واقفه جنب جوزها لأنه مريض
• الصبح تنزل تفتح محله
• قايمه بشغله وحله محله
• فى الدور التانى
• المعلم يمانى جوز جارتنا أبله تهانى
• جزار على قده يسحب جاموسته وهى تعانده
• يلف فى حارتنا مرة واتنين
• وينده بكره من ده… بقرشين
• مانعبروش من قلة قروشنا
• ونعدي جنبه لاويين وشوشنا
• وجارتهم ست نجاة
• عايشه لبنتها بعد ماجوزها مات
• وجوزها عم تابعى بتاع البصل
• قلبه بفته بيضا و زى العسل
• كان يسعى لرزقه ولايحب الكسل
• الله يرحمه ويحسن اليه
• ويجعل كتابه فى يمين ايديه
• مشينا وراه نقرا عليه
• قرآن كريم يوصل اليه
• ومشيت ورانا مراته نجاة
• تقول فينك ياتابعي ياسبعى إللى مات
• نقولها ياست نجاة صراخك عذاب للى مات
• شوفي إنتي بنتك وحافظي عليها
• وراعيها دا إنتى إللى ليها
• وعنينا ليكي إنتى وحميدة
• وحميده تبقى بنتها الوحيده
• ننده عليها ونترجى فيها
• تاكل معانا فى حصة غدانا
• أبدا ماترضى وامى ماتهدى
• الا ماتاكل معانا أكلنا
• عشان تحل فيه بركة ربنا
• وفى أوضة تانيه على بابها قطة
• ودي تبقى قطة أبله بطة
• ست جدعة وإيدها فرطة
• بتساعد نجاة بشوية حاجات
• والدور التالت
• كوم والبيت كله كوم
• ساكنه فيه عيلة
• فرح ومغنى كل ليله
• تقول راحة بالهم من كتر مالهم
• والحقيقة هى جعانين يغنوا شبعانين يغنوا
• وفى ساعة العصاري تلاقي غديوه
• ماحدش يعرف إيه إللى فيها
• عشان هى طبخة بايته
• من ليلة فايته
• وكل اوضة تطلع نصيبها
• زى مايكون على قد إيدها
• صحن بامية بلحمة ضاني
• من جارتنا ابلة تهاني
• وطبق بصارة من عند أم سارة
• وممبار محمر وكام رغيف مأمر
• وحتة سمك وشوربة يمك
• أما الحلو سد الحنك
• الدور الأخير
• فى الدور الأخير محمد خضير
• تمطر المطرة يقول ده خير
• تنقط من سقف اوضته
• تبل عفشه تذيد له حيرته
• يحط تحت المية طشته
• دايما راضي بمر عيشته
• وجنبه لزق لوسطى رزق
• نقاش بريمو عايش فى أوضته هو وحريمه
• هند وسعاد وبينى وبينكم يتفات لهم بلاد
• وجنب منهم اوضة تانيه ساكنه فيها الست علية
• ست قادره ومفتريه عاى ضاربة البنت هنيه
• اكمنى يعنى بنت جوزها تدعك البلاط ببوزها
• ولما جوزها يعود من شغله تدلع فيه قوي قوي وتشاغله
• ينسى دوغرى بنته وعذابها وينسى حتى مين اللى جابها
• وفى ليلة من الليالي نامت علية
• وقامت هنيه معاها مقص وسوء النيه
• بخفة قطة نطت نطة …الست علية بقت زلبطة
• السطوح
• وأوضة عم قدرى فوق السطوح
• من تحت عقب بابها ريحه بتفوح
• نقول دخان إيه ده ياعم قدري
• يضحك يقول ده بخور عال العال
• من بلاد تركب الأفيال
• وجنب أوضته عشة فراخ
• من ريحة عم قدري ديكها داخ
• وراح يدن آدانه فى غير أوانه
• وجنب العشة غية حمام
• صاحبها يبقى عمك امام
• يصرخ يقول بقى ده معقول
• عيال جيرانا واكلين ودانا
• دايما صراخ غير صوت الفراخ
• ياناس حرام عايز انام
• وعيالنا تقوله خلاص ياعمو
• هنبطل صراخنا وهندبح فراخنا
• عشان سيادتك تعرف تنام
• وجنب منهم منشر كبير
• دايما تملي مليان نشير
• هدوم جيرانا وجيران جيرانا
• عشان كل اوضة تغسل غسيلها
• تطلع سطوحنا تنشر نشيرها
• وفى يوم من الأيام جالنا زلزال
• محمر عنيه بيقول العزال
• من خوفنا بقينا نجر رجلينا
• شوية وجالنا المحافظ
• وقال علينا هيحافظ
• بخيمة إيواء يبقى باله منا راق
• ويروح شتا وييجي صيف
• لازورنا حد ولاجالنا ضيف
• قصر الكلام …. بعد الخيام
• وزعونا عالمقطم والنهضه
• ومدينة السلام
• فين إنت يابيتنا.. يازينة حارتنا
• فيك اتولدنا …. وكبرت ولادنا
• وعدت شهور. ومرت سنين
• أخدت دفايا .. وسابتلي الحنين
• بقلم ساكن الدور الثالث/ طارق السيد حسين فاروق